Slovenskú verziu nájdete tu.

Tel prikladoste vaš vijetnamiko manušipneste rodkerel, kana the soske pen andre komunistikaňi Čechoslovakija zachudne te sikhavkerel rasizmuskere jekhipena. „O dad la daha pen mek daran, the na phundravena pen – daravutno šuňiben učharena le moldajenca, save lenge hine prindžarde,“ vakerel e fotografka the vizualiko artikaňi Kvet Nhuyen.

Načirla lake geľa avri e pustik Všetko čo nás spája, kaj phundravnones vakerel pal dživipneste vaš vijetnamiko manušipneste andre Slovakija. „Kamľomas te pašisaľol, hoj šuňibena, save predživavas, šaj hine but iľindone oleste, so predživkeren but manuša.“

Andro prevakeriben ča avreste avriachaľarel, soske lakero dad la daha odgele andal peskero themeste, andre soste hiňi vijetnamiko kultura aver sar slovačiko, sar odi diferencija šunelas kana bariľas the oda, save dukhaviben pen andro vijetnamiko manušipen preanen jekh generacijatar pre aver.

Tumen uľiľan the dživen Slovakijate, the hin tumen vijetnamiko aviben.

Ha, uľiľom andro Nové Zámky. Me som imar aver generacija amari fameľijatar Slovakijate.

Kaj andro Vietnam dživelas tumari fameľija?

Andro serviko kotor talam duj ora le motoriha le Hanojistar, angluno forostar Vijetnamoste.

Kana the soske tumaro dad la daha prebešle?

O dad avľa beršeste 1988. Anglunes avľa ča jov korkoro, the kana imar pes rozginďa, hoj adaj ačhola, avľa pal leste the miri daj la pheňaha.

Oda sas maškarthemutno jekhebuťariben maškar komunistikane themende – Vietnamoste the Čechoslovakijate. O projektos as sthodo sar ča vachteskero zabešiben, tel saveste šaj avrikidne themutne resenas neve bižaja andal aver themestar, save bi džanenas paľis te sthovel khere. Pal oda sas čačes baro interesis, bižajakero resľipen oda cajchinel feder buťi, bareder love the feder dživipnaskere telethoďipena.

Pale khere imar na avľa.

O dad dromarďa andro agorutnones „čalaviben“ vaš jekhebuťaribneste, savo agorisarďa Kovľi revolucijaha beršeste 1989. The kana peľa o režimos, peľa the „komunistikano projektos“. O dad pes rozginďa te ačhol andro biphandlo them – andre akorutňi Čechoslovakija. E daj pal leste avľa nasigeder, kana imar sas presikhado, hoj amenge andro nevo them avela feder the hoj kana bi džanahas amenge te sthovel oficijaliko zabešiben.

So perelas sar jekhbuter?

Ča oleste, hoj demokratikano režimos hino sajekh feder avrikidňipen, but bari uloha presikhaďa the biphandľi lovengeri ekonomika, savi mire dadeske diňa sthoďipen te ačhel podňikateľiste. The mek oda, o them ľikerkerelas podňikateľiko čalaviben, aj te federisaľol ekonomikakero ačhiben andro them the šegitinďa les te zorasaľol.

Sar zadikhelas pre oda baro dživipnaskero visariben tumari phureder phen?

La sas akor 9 berša the vašoda but ľikerel goďate – o dživipen Vietnamoste the visariben pal prebešibneste. Oda sas pedal late but bonďarde berša. Aľe but pal lende na vakerel.

Aňi pal maribneste andro Vietnam? Tumaro dad la daha les zadikhenas šuňibnones.

Na džanav, sar oda e phen zadikhelas, aľe talam nabut, choc o dad la daha o mariben but predžidžile.

Barbut?

Phenďomas bi, hoj činores vaj avka nazadikhades. Kana na zachudňom man te phučkerel pal lengere leperibnende, na vakerelas pes andre fameľija pal maribneste. Adi duma pes sajekh varesar zaučharelas andro bareder tematiko kotor, sar hin ko priklados čoripen. Na leperenas pen ňisave leperibena. Pal maribneste andro Vietnam dži akanakes vakeren phares.

Ajso ačhiben musaj te jel igen dukhavno. Tumen gindinen, hoj zaarakhado sposobos šaj te jel ajso, hoj pes pal oda na vakerel?

Oda hin šajutno sposobos, sar oleha andre peste vakeren. Aľe oda hin šajnones sthodo le amaro vijetnamiko avibneha.

The odi hiňi savi?

Avka hoj na džanav, soske ada avibnaskero tipos navľarav sar vijetnamiko. Dikhľom, hoj o Vijetnamci the Vijetnamki pes oda visarkerel. Na kamen but te vakerel pal maribneste. Na kamen aj len vareko te sajinel. Oda sas nalačho vacht the thoven pen te čerinkerel phare leperibena pre zor, vaj pre vareso aver lačho. Zadikhen oda avresar.

Tumen oda lengero andruno predživkeriben the fameľijakero čirlatuňipen jakhvales interesinel.

Ha, pre savore ala ačhibena zadikhav igen važnones the šuňibnones. The talam oda hin oleha, hoj miri fameľija oda avka zorales te zadikhel the predživkerel na kamel. Me oda akanakes gindinav perdal aver formate.

Sar dživelas tumari fameľija Vietnamoste?

O dad sas sikhado mechanikos the pal avibneste andre Čechoslovakija chasňarďa peskero sikhaviben paš ačhavibneste. Kana ačhiľa sar podňikateľis, zachudňa te bikenel o renti. Elšines pro jarmoki, paľis pro pľacos. O manuša akor but cinkerenas o renti, save na sas duchudne andro skľepi. Nasigeder amen sas the baraľi skľepa. The kana avle pro bikeňibnardo than o modakere khera the skľepakere centri, o dad peske phundraďa vijetnamiko bistro. Sikra sikrate pregeľam dži thaneste, kana amen hin ča e reštauracija the e skľepa zaphandňam.

Džal leske mištes?

Gindinav, hoj ha. Den avri avresave azijakere chavibena vaš but lačhe love. Andre reštauracija hine but vachtoste. Aľe le manušenge šmakinel the gindinav, hoj zadikhen the oda, hoj miro dad la daha hine lačhe the paťivale manuša.

Andro Martin hiňi jekh ašunďi reštauracija NhàBè. Lakero terno peskeripno pes maškar gastrothaneste thovel te vakerel pal peskero fameľijakero ačhibenste. Prindžaren tumen?

Ha, le Nameha, savo hino jepašuno Vietnamcos, amen prindžaras. The jekhetanes zachudahas Vietnamiko ďives Požoňate. Gindinav, hoj leske pes bachťarel te sthovkerel vijetnamiko džajstra andro peskero zarodkeriben.

Hin interesikanes, hoj andre tumaro the leskero pripados pes pal fameľijakero čirlatuňipneste interesinel aver generacija. Sar te bi o terne imar zachudne te rodkerel pal peskeri identitate.

Ha. Zadikhav oda, hoj ačhel varesavo „boom“ pal peskeri identitate the gindinav pal oleste mištes. Buter the buter terne manuša hangosaľon the zathoven pen ke peskero aviben, vakeren pal peskere probaľišagende. The na ča o Vietnamci the Vietnamki. Aľe kana džas andro regijoni, mindig hin ajse manušen čino. Andro Čechi hine manuša buter phundrade kana rodkeren pal peskeri identita, aľe paťav, hoj sikra sikrate oda ela the ke amende the avaha šunde.

Soha oda hin, hoj pen tumen sar cikňiben akanakes phundraven?

Sphandľipen talam hino ľikerdo le vijetnamiko avriľikeribneha le čhaven. Pre aver sera phundravipen avrisikhavel bareder biphandľipen the pašaľipen, kaj o manuš dživel. Te vakerel pal peskero avibneste zachudňom dži pre uči školate. Pašaľipen vaš Uči školate le čitrengere artikaňibnende hino buchleder phundrado the bares mange šegitinďa.

Savo hino vijetnamiko avriľikeriben?

Prisneder. Tel mande oda avka nane ča andre vijetnamiko kultura, oda hino sphandlo le migranťiko probaľišagenca the palalipneha. Adaj džal but pal racijoste. Pre oda, aj e fameľija džal dureder, aj pes te sthovel. Olestar imar nane than pedal phučibneskero rozgiňipen vaš identita vaj pro baro gindišagos opral vareso filozofikaneder.

Maškar tumende the pheňate hin dešudujberšeskeri diferencija. Sar oda zadikhel joj?

Našťi vakerav vaš late, aľe gindinav, hoj pes sphandľa the le slovačiko kotoriha peskera identitaha. Haminen pen odoj duj lumi. Thovelas pes te džal tel normate, savi prikerde imar amaro dad la daha, so mek na cajchinel, hoj oda akor hin namištes vaj mištes. Mamuj oleste hoj sikhľiľa uči škola Bansko Bystricate na geľa la buťaha andro bibacht the geľa bachtale dromeha – kerel andro najeskero študijoste.

Soske hino najeskero študijos „bachtalo drom“?

Najeskero dizajnos hino pedal elšiňi vijetnamiko generacijate tipikano arčonďipen. E phen andr´oda talam šunel bizovipen, aľe gindinav, hoj sas la baro potencijalos the andro aver arčonďipen. E phen paľis prebešľa Angľijate, kaj peske arakhľa vijetnamiko manušipen, le romes the buťarel andro leperdo najeskero študijos. Kana sar peske le manušenca odarik achaľolas, phenďa peske, hoj oda hino than, kaj pes arakhela.Oda džal vast vasteha le prikeribnenca the moldajenca amari date. Aľe oda savoro hine ča miro gindipen.

Choc tumari daj dičhol avri prisnones, diňa tumenge ajso bipandľipen, kana e phen šaj prebešľa Angľijate.

Agoral ha, aľe kana somas terňi čhaj, sas buteres prisno. Sas man olestar bari dar, vašoda hoj mange gindinavas, hoj oda avka musaj te jel. Aľe paľikerdones oleste zachudňom te rebelinel.

Andre soste sas lakero zoraľipen avka baro?

Dži ňič našťi keravas the but olestar mange sas avrisikhado. Našťi phiravas ňikhaj ča andre škola.

Barbut hoj ňikhaj?

Bizo, somas ke amaľinate the iľindones. Sas man but sphandle pravidi. The kana sas savoro mištes, sas man šuňiben, hoj kana pes varekhaj mangava, ela namištes.Vaj oda ela but džinďardo vakeriben, saveha na kamavas te predžal, aj te mange na choľarav la da. The akor aňi anglunes ňič na rozginavas.The sphandlones oleha na kamľomas te pherďarel uloha sar lačhi čhaj, bo e daj man perdal oleste avriľikerďa. Ala andrune kikidňipena hine jekhphareder – te na kamel varekas te bibachťarel.

Špecijalnones terno čhavo oda musaj phares te ľikerel avri.

Ľikerav goďate, hoj jekhvar somas ke amaľinate the ačhiľom odoj buter sar sakoďiveskeres. La daha amen dokerahas, šunavas avrithovibena, hoj ada našťi kerav the hoj la na kamav. Ajso voďikano bonďaripen sas pharo.

The save sas školakere kamibena?

Ola man sas, bizo, našťipnarde. Kana sar mire amala andre maškarutňi škola phirenas jekhetanes, zdžanas pes andro partiji, phirenas andro kini, me našťi. Kaj ča somas avrunestar avresavi, kamas ke lende te iľinel choča andr´oda, hoj lenca varekhaj džava.Aľe našťi. Jekh luma, so mange sthoďom, sas online luma.

E socijalika sijeťi?

Me but somas pro blogi. Paľikerdones le blogeske šaj man rozvakerďom, arakhľom mange odoj peskero manušipen.

Sas oda manušipen vijetnamiko vaj slovačiko?

Slovačiko the avrithemutno. Oda sas sposobos, sar pes te resel „avri maškar manušende“.

The so o amaľipena?

Sas man bacht pro amalina. Ča „populariko“ klasakero kotorestar mange arakhľom jekhtone introvertki the paľikerdones lenge zachudňom te bloginel.

Jekh lendar but genelas. Me, visardones, dži akor na somas avka pašes ke literatura, the sikhaďa mange le Harry Potter – igen populariko serija. Oda sas pedal mande nevi luma. Sikra sikrate kana genavas man resľom the ko Denník princeznej the zachudňom te lekhavel o blogi perdal iľindo štiloste. Avka arakhľom peskero kreaťiko luma. Oda hangosaľol pherasunes, aľe avka univerzaliko ačhibena džanen te bonďarel the pedal mande oda sas bares barvalo, vašoda hoj oda mange phundraďa drom ko lekhaviben.

Sar oda šaj jel, hoj tumen tumaro zoralo dad la daha mukhle te sikhľol andre bari Požoňa, the anglunes andre artikaňi škola?

Oda, sar zadikhavas la da, sas bares the pal mande. Cikňibnestar avka šunav varesavo kikidňipen les oduj serendar – andal fameľijakeri seratar vaj andal seratar vaš slovačiko nacijatar. E daj pedal mande šoha na gindinelas nalačhes, diňa mange but kamiben. Mamuj pharo bararipneste hin amen adaďives bares lačho sphandľipen, vašoda hoj imar džanav, sar gindinelas. E daj džanelas, ho sikhľiben hino pedal mande but baro the hoj paľikerdones sikhľibneste šaj džav anglal, šaj resav feder buťi, te korkorisaľol – the te avel bachtaľi.

Čerinďa pes varesar tumaro sphnadľipen?

Ha, the joj pregeľa varesavi evolucijaha. Varesar kovľisaľiľa. Buter amen džanas te vakerel pal dživipneste, sikhľibneste, pal suňibnende. The zachudňa oda akor, kana avľom pre uči škola.

Tumen džanenas, hoj profesikones džana le artikano dromeha, hoj sikhľona la fotografija?

Na. Elšines geľom Bansko Bystricate pre politologija. E fotka dži akor šunavas sar miri pasija.

Soske tumenge kidňan e politologija?

E politologija mange – pale – kidňom avri le goďikano dovodostar. Me daravas, hoj man ňikhaj na lena. Miro goďipen sas telemardo the džanavas, hoj pre politologija kiden bijo primački le sikhľuvnen, saven hin lačho znamkengero prijemeris. Kaj ča man les sas, ile man the avka geľom Bansko Bystricate.

Savo gindipen tumen čalaďa ko čerišagos vaš sikhľibnaskero odboriste?

Ňilate somas ke pheň Angľijate, kaj zachudňom buter te foťinel. The le kamibneha mange diňa feder foťakos. The mek pes andre famaľija ačhile daskeci ačhibena. Oda savoro man but bonďarelas. Zorasaľiľa pes mange šuňibnaskero predživipen the politologija mange akor avľa sar zuňinďi.

Zachudňom man te zdžal the le manušenca, save sikhľonas artikane odbora Požoňate the oda pre mande perelas. Vašoda man rozginďom te probaľinel o primački pro VŠVU the ile man.

The oda sas andre varesoste ča avka?

Phenas, hoj oda sas sthoďipen. Džanavas, hoj rado foťinav, hoj pes oda manušenge pačisaľol the avka oda probaľinďom. Aľe akor mek le artikaňibneste avka na achaľuvavas. Oda sas ča ajso šuňiben vaš šukaribneste andro čitro.

Kana tumen arakhľan, hoj tumen bavinel foťišagos?

Imar kana somas igen terňi, sas man talam dešupandž berša. Foťinavas luluďa, uľici the paľis zachudňom te foťinel le manušen. Oda sas pedal mande but interesikanes. Anglunes foťinavas mira strično pheňa. Amen sas ajsi probaľinďi para – džanavas laha te sthovel o šuňiben, savo predžidživavas. Ala fotki sas aver sar bachtale fotky le dovoľenkatar vaj manušengere selfi, save dikhľom pro internetos. Butervar oda sas kaleder, bibachťikane fotki, o inscenaciji vaj e moda. Man bavinelas te avel andre moda avresavi.

Sas tumen the varesavi inšpiracija?

Ha, dikhľom mange le manušen, saven dodikhavas andro blogi the dikhľom sar jon foťinen. Abo man thovavas te kerel pal mande vaj te čalavel dureder. Sigeder oda sas ajsi technikaňi vaj arčonďipnarďi buťi.

Kana avľom andro VŠVU, thovas man vaš andrune sondi andro manušeskero andripen. Ča čitrostar džanavas the te priphandel the pherďaripen.

Le sikhľibnaskero čerišagoha avľa the nevo foros – Požoňa. Oda sig sas aver biphandľipen?

Oda talam šoha na zadikhavas, aľe gindinav peske, hoj oda hino čačikano cajchos – chudňom biphandľipen. Imar man na sas šuňiben, hoj adaj na iľinav.

Andre Nové Zámky, kaj bariľan, tumen sas ajso šuňiben?

Ha. Bizo, kana oda pes ačholas, somas mek čhavo the terňi čhaj. Paťav, hoj pes oda sikra sikrate čerinel the odoj. Aľe mindig oda cikneder foros, kaj hin bareder šajutňipen, hoj o manuš sar me ela varesave sposoboha dikhado, the vašoda andre jakha avren manušen dikhlo avresar.

Zadžidžiľan tumen o rasizmus?

Oda na sas fizikane maribena, sigeder hoj laveskere vaj avriasabena. Aľe či oda sas rasizmus, na džanav. Sigeder hoj oda bi navľaras avka, hoj man varesave manuša varesave sposoboha odčhivenas pestar. Sikra sikrate man šunavas sar telemarďi. The Požoňate man avka na šunavas. The sas man ajso šuňiben, hoj manuša pal mande buter interesinen the zadikhen averipen sar oprethoďi moldaj. Vijetnamiko kultura vaj identita, savi hin andre mande, zadikhenas sar aver dikhiben, sar vareso ekzotikano. Špecijalnones andre artikavňi škola hino achaľiben pedal identita, averiben the diverzita pre avresavi urovňate the hin odoj but paľikerdo.

The vašoda Požoňate tumenge chasňarena korkora pestar?

Ha, dži Požoňate džanavas te jel korkori peha. Oda mange but šegitinďa. Kana ko priklados man thovas te arakhel buťi kavijarňate vaj chockaj avrether, barbut na šunavas, hoj som avresavi.Oda sas pedal mande but bares.

Šoha pen tumenge na ačhiľa, hoj tumenca vakerenas sar la avrithemutnaha angľikanes?

Ačhiľa pes mange the oda sas namištes, bo oda tumenge leperela, hoj adaj na iľinen. But zorles oda varesavo vacht rozginavas, aľe čerinďom miro zaterďipen. Dikhľom pre oda andal visarďi seratar. Kana adaj avela avrithemutno the vakeraha leha slovačikones, šaj oda jov, visardones, te šunel avka, hoj na sam zachudne pedal avrithemutnende. Oda ňič na čerinel vaš oda šuňibneste le ajse probaľišagostar. Phenel tumenge: E Slovakija peske gindinel, hoj hiňi but jekhto the hoj manuš sar me našťi avel sphandlo ala socijetaha. Pre kijathovibneste, Čechende hino but bareder vijetnamiko manušipen. Kana som Prahate, o manuša manca vakeren čechikones, na angľikanes.

Na ela oda sphandlo oleha, hoj elšino vijetnamiko manušipen Slovakijate sas zaphandleder, the le manušen lestar „maškar amende“ avka zorales na zadikhas?

Leperdo zaphandľipen nane sphandlo ča la misuraha, aľe the le peskere probaľišagoha le vijetnamiko manušipneha. Rozginav oda čino the andre miri pustik Všetko, čo nás spája. Príbeh slovenskej Vietnamky.

Pro agor vaš Kovľi revolucijate the kana avľa nevo zoraľipen pes phundraďa the jekh andal phure dukhavibnendar, savo sas andre Čechoslovakija. Oda sas zadikhiben vaš aver narodnosťen perdal jekh themeste. Zachudne pes te sthovel o partiji sar skinheads, save pen presikhavenas avka, hoj na kamenas maškar peste averipen. Miro dad peske oda vacht zadžidžiľa. Džanel, sar oda te avel, kana les na kamen, na ľikeren.

Ačhile pen the aver veci. Ko priklados butvarutno murdaripen le Vietnamcen pre Stará Vajnorská, savo sas bares medijalizimen. Akor sas berš 1994 the vakerelas pes, hoj pen maškar peste marenas vijetnamiko gangi. Andr´oda sas zacirdle dži savoren, kas šaj zacirdle, le vijetnamiko manušipneste oda na šegitinďa. Baronas ksenofobika peribena, baronas skikidňipena. O dad akor phenelas, hoj pes čačes zachudňa te daral the gindinelas, ko hino andr´oda them. Ada tel mande miro dad la daha šunenas the talam oda šunena mindig.

Tumen gindinen, hoj pes oda na čerinela?

Gindinav, hoj ke lende na. Sphandel pes oda la bareder čirlatuňipneha vaš Vietnam the leskere pharipnenca pre francuziko kolonizacija the vijetnamiko-amerikaňiko mariben, kaj sas Vietnamciko telemariben mek buter šundo.

Sar oda gindinen?

Le manušenge sas but dikhadones, hoj hine ola teleder socijeta the hoj vareko opral lende len šeraľol. Oda jekh o dad la daha tel mande zachudne te šunel, kana andro 90. berša sas leperde peribena. Lengero zaphandľipen hino bizovnones the sar forma vaš zaarakhipneste le aver generacijen. Gindinav, hoj oda hin vareso, so musaj te skerel mek but. Oda jekh andal anglune dumendar vaš integraťiko dukhavibneste.

Na šegitinel avrenge, kana dikhen, sar tumen pen sphandľan la societaha the hoj san bachtaľi slovačiko Vietnamka?

Pharo phučiben, bo oleha len hin zoralo ašardo šuňiben pre vijetnamiko identita the kultura, savi adaj ande. Tel mande o dad la daha mandar kamen sig hoj la Vietnamka sar Slovenka. Aľe bizo, oda ajso šuňibnaskero hamipen.

Miro priklados lenge bizo šegitinel, sem avľa andre Slovakija perdal oleste, aj man jen feder telethoďipena pedal dživipneste. Hine bachtale, hoj som smiripnarďi the bachťarel pes mange. Lošaren, hoj lekhaďom e pustik the hoj la lekhaďom andre slovačiko čhib.

Mek mindig predžan priačhibneha, hoj miro dživipen na musaj te avel ajso, savo kamen pedal mande jon, aľe hoj šaj te jel avresavo.

Hoj na musaj te mukhel jekh pedal avreste.

Phenďan oda šukares, aľe oda hino mek phareder. O dad la daha pen mek daran, the na phundravena pen – daravutno šuňiben učharena le moldajenca, save lenge hine prindžarde. Visarena pen ke oleste akorutnoneste, so prindžaren.

Gindinav, hoj bi sas mištes le goďipneha na mukhel peske perdal jekh identitate aver identitatar, aľe kaj ča len nane oda andre lende predžido, daran pen olestar.

Del tumenge oda zor, hoj tumari fameľija ňič na vakerel, vaš rodkeribneste pal tumari identitate the maškargeneraťiko darate?

Ha, kamav oda te achaľol. Gindinav, hoj kana bi pedal mande o sikhľiben le dovodendar, soske amen avka ľikeras, sar amen ľikeras, na sas baro, akor bi talam somas lovengeri vaj doktorka. Vaj šajnones sar leperďi sikhaďi politologikaňi, vašoda hoj bi andre mande kikidavas vareso, so the o dad la daha kikidenas. Aľe me imar džanav, soske oda kikidenas the na sthovav oda lenge vaš nalačhes.

Hiňi adi tema sar inšpiracija pedal tumaro artikano keriben?

Šajutnones. Akanakes man „bavinav“ sar investigatikaňi žurnalistikaňi. Man bavinel te rodkerel, te davkerel peske jekhetanes jekhipnone kotorora so paľis sthoven jekh savoripen.

Kana zachudňan te rodkerel tumari identita?

Kana meg man na džanavas te navľarel andre ada „investigaťiko than“, akor oda sas talam la choľatar. Soske pes oda ačhel? Soske musaj andre slovačiko socijeta te teľarel le stereotipende? Soske amen hin bidžaňibena the andre amari fameľija? Sar oda calo ačhel? Sthovavas mange ala phučibena the na džanavas pre lende te odphenel.

Le save bidžaňibnenca mamuj buteripneste tumen sprindžarďan khere ke tumende?

Hoj o Slovaka nane hine ajse sphandle. E daj mange buteres thovkerelas jileste, hoj pedal Vietnamcende hiňi jekhbareder moldaj e fameľija. Oda hin oda, so amen savoren ľikerel jekhetanes.vašoda but kamelas, mi peske lav le romes le Vietnamcos.

Merkinkerelas man pre oda, hoj kana bi mange iľomas le Slovakos vaj le muršes andal aver themestar, na džanel mange te del bizovipen, hoj paš mande terďola calo dživipen. Aľe ada hin hin but baro buchľaripen, vašoda hoj prindžarav XY pripadi, hoj pes ada ačhiľa the andre vijetnamiko fameľija.

Soha tumen akanakes buťaren?

Me som pro doktoranťiko sikhľibneste the buťarav sar frilancerka.

Savi tema hin la tumara dizerťiko buťi?

Thovav man te odphenel pro phučiben, kaj the kana ačhiľa andre Čechoslovakija rasakero the rasizmuskero konceptos.

Rozthovav pre oda priklados vijetnamiko manušipen, vašoda amen avľam beršeste 1966 sar elšine manuša ala narodnosťaha. Na vakerav, hoj oda sas elšino manuš aver narodnosťaha, savo avľa andre Čechoslovakija, aľe perdal maškathemutno programoste oda sas elšines zadikhaďi migracija ajse manušengero gineha (andre ezera). Elšines sas šunde sar manuša, save adaj avle agorutnones te sikhľol vaj te resel džanibena, aľe tel govermentoskeri propagandate sas zadikhade but jekhipnones. Churdones oda džal pal artikaňikano rodkeripen. Ke mande oda cajchinel, hoj rodkerav o archivi, thovav man te del lenge interpretacija vaj len te avriachaľol.

Tumen leperďan tumari pustik Všetko, čo nás spája, savi avľa načirla. So andre late o genaris arakhela?

Kamavas, aj te le manušen, save penge pregenena e pustik, na jel šuňiben, hoj penge pregende žaľakero vakeriben le slovačiko Vietnamkatar. Nane oda ča pal oleste, hoj sam aver narodnosťatar vaj amen hin aver kulturi. Kamľomas te sthovel pašeder, hoj o šuňibena, save predžidžiľom, šaj jen but iľindone oleste, so šajnones predžidživen but genara, hoj oda hino manušikano ačhiben. The kamľomas te sikhavel pre oda, hoj o veci, save amen ča kamukeri jepašaren, šaj aven sar interesiko sphandľipen.

Sas pedal mande but bares te bičhavel lačho signalos – te sikhavel savoro oda, so amen sphandel. Mangavas the mangav peske aj te oda hangosaľol sar vareso, pal soste šaj jekhetanes vakeras. The šaj oda hin the šegitišagos pedal aver generacijende, save pen andre pustik arakhena the šajnones penge phenena, hoj nane korkore, ko vareso iľindo šunel.

Kvet Nguyen (1995) Themutno naveveha Nguyen Thi Hoa. Vietnamiko Slovenka, savi bariľa andre Nové Zámky. Agorisaľiľa sikhľiben vaš fotografijate pre Katedra fotografie a nových médií VŠVU Požoňate, kaj akanakes sikhľol vaš doktoratoste. Sthovel pes le temenca vaš averipneste the identitate. Ada berš lake avľa avri pustik Všetko čo nás spája.

Našli ste v článku chybu? Napíšte nám na [email protected].