Slovenskú verziu textu si môžete prečítať tu.

Sako tosara avav andre buťi dži 7:10. Lekhavav man andro phiriben the kisitinav mange tosarutňi kaveja. Maj kana dži 7:35 pes zachudela sikhaviben, mek man uštavkerav. O rozvrhos amen hin sthodo, ľigenav man lestar. 

But vachteste som le čhavenca andal 5. the 6. beršipnestar. Som thoďi ko čhave le sasťikane bilačhipneha, phirav pal lende andre klasa pre dojekh sikhľiben. E grupa hiňi sthoďi le efta čhavendar, buteres la disleksijaha, disgrafijaha vaj diskalkulijaha. Varesave na džanen te genel, varesave peske došalen ľiteri the aver bisteren – butvar the bazutňipena. Choc hine pre aver učard, butvar amen visaras ko sikhľariben andal angluno, dujto vaj trito beršipnestar.

Buťaras la bavišagutno formaha. Jekhetanes genas neve ľiteri, gina, lavora the lengere džanľipena. Jekh ďiveste man zachudav jekhe čhaveste, aver ďiveste avreske. Varekana šaj som le jekhe čhaveha the duj ora pal peste, akor man thovav te „cirdel“ leskere vaj lakero merkišakostar so jekhbuter. 

Pre varesave sikhľibena sam andre klasa, aľe butvar amen čalavas andre školakero pustikakero kher – amaro cikno smiripno svetos. O pustikakero kher nane ča pal pustikende, oda šukar than le pokrovcenca, tulivakenca, bare televizoriha, videjo-sikhavenca the sikhľibneskere bavišagenca. The anglunes oda hino bidarangutno than. O čhave odoj rado hine, šunen pen odoj biphandlones, smiripnones the peha korkoreha. The akor pen sikhľon feder.

Nane nalačho čhavo

Varekana som paš sikhľibneste naužarďi, sar pen čhave džanen te čerinel akor, ko paš lende bešel vaj terďol. Butvar pes pal čhavende le sasťikano bilačhipneha phenel, hoj na šunen, hine choľamen vaj na kamen te jekhebuťarel. Man hin ajso probaľišagos, hoj kana ke lende vareko avel the čačes hoj lenca buťarel, nane hine ajse. The vašoda igen paťav oleste, hoj nane „nalačho“ čhavo – ča čhavo savo hino na achaľardo vaj la socijetaha sig odčhido.

Kampel te dothovel, hoj na sajekh hin lokes. Me buťarav le čhavenca, save pal jekh minuta bisteren ľitera, pal savo mek jekhvar vakerahas – the oda pes ačhol the dešvar.

Probaľinav savoro – šundo sikhľiben, šigitipena, biraipen. The avka hine ajse ďivesa, hoj mange musaj te phenel, hoj oda mištes kana šunav zumavipen. Šegitipen le čhavenge na cajchinel te jel jekhfeder, oda hin pal biraipneste the mek jekhvar te probaľinel.

Calo ďives le jekhe sikhľuvneha

Sikhľarde the pedagogikane šigitipne zadživen the zvičiňibena, pal save pes but na vakerel. Oda hin the ko priklados the buťi le čhavenca, saven nane peskere bazutna higijenikane sikhľipena. Paš ačhibnende, kana sam jekhetanes pašes andro zaphandlo than, oda chockana jel phareder the manušikanes. Vaš sudoste man thovav te rodel achaľiben, oda sphandlo le mira buťaha. The le zvičiňibnen, anglal save terďon ajse čhave, hin peskere aša.

Hine the sikrici, kana man marav peha korkoraha the phučav man, či som dosta ajsi lačhi. Kerav pedal čhaste anglal mande čačes hoj jekhbuter? Oda phares te dikhel, kana avela sikhľuvno vaj sikhľuvňi pal jekh kurkeste the maj savoro bisterďa olestar, so amen jekhetanes sikhľiľam. Dukhal oda.

The hin man daravipena, anglunes le molarďipnestar le kolegendar, sikhľardonendar vaj pašaľipnestar. Vareko bi peske šaj gindinel, hoj man le čhavoreha „ča“ bavinav the na sikhavav les gina the ľiteri formaliko sposoboha, sar oda ačarutnones jel. Čačikanes oda hin avresar. Te avel calo ďives ča le jekhe čhaveha, lokes te šunel leskero čalaviben, limiti the dukhavibena hin butervar phareder, sar te sikhavel calo klasa. 

Pal školate andre aver buťi

Andre krizakeri ačhibena pes ačhol hoj ačhavav the andre aver klasi sar andre ola „mire“. Kamav oda te kerel, bo rado prindžarav the aver čhaven the dav lenge vareso le peskere goďipnestar. Amaro sikhľiben džal avka, hoj 30 minuti opakinas sikhľariben the paľis amen vakeras, vaj o sikhľuvne penge mangen goďa. The amenge jekhetanes bavinas džanľipneskero bavišagos. Paš ala sikhľibena peske butvar goďisaľuvav, hoj varesave sikhľuvne mange paťan buter, so hin pedal mande lošales.

O prestavki man hin butervar biphandle, aľe jekh či dujvar kurkeste man hin caloďiveskero dozoris – akor man nane biphandlo vacht. Pro dilos le čhavenca na phirav, vašoda hoj andre jedalňa nane ajci than pedal dujto učard.

Pal 13:30, kana miro buťikano vacht agorisaľol, avka hoj smiripnones mange bešav the gindinav pal oleste, sar mange kisitinava aver ďives pedal mire sikhľuvnen. Save čalavibena bi len interesinenas? So bi len čalavinelas dureder.

Buťikane ľila mange buteres kisitinela e sikhľarďi vaš sthodo sikhľiben, miri uloha hin te adaptisarel le sikhľuvneske – leskere čalavibneste, kamľipneste the akanutno thoďipenste. Avka hoj sam le sikhľardonenca mindig sphandle. Vakeras pal čhavengero zoraľipen, pal oda, so lenge džal the kaj lenge kampel ľikeriben.

Palodilos avel aver buťi andro centros vaš terne manušen. Aľe oda imar hino aver ačhiben.

Našli ste v článku chybu? Napíšte nám na [email protected].